شهداء بالمقاس " نقي الجنة اللي تناسبك "

 قررررررررررررب قررررررررررب قرررررررررب عندنا جميع المقاسات نقي الموتة اللي تناسبك وانا اقولك مكانك في الجنة مهرجان توزيع شهادات الشهادة خد فكرة وموت بكرة قررررررررررب قرررررررررررررب .......

أهلاً بك عزيزي القارئ في مهرجان " شهداء بالمقاس " والبيع بحسن النية ..

- لو مُت في التحرير في بداية الثورة طبعاً يا باشا إنت شهيد ومن النوع الفاخر محدش هيقدر يفكر يقول مثلاً نحتسبك شهيد لا إنت شهيد وسوبر لوكس كمان الناس طالعة من ثورة مش عاوزين حد يتكلم معانا.

- لو مُت في أحداث ماسبيرو فانت يا إما مسيحي وساعتها تشوف الأوكازيون اللي عاملاه الكنيسة يا أما مسلم وطبيعي هتبقى شهيد بس بدرجة قليلة شوية لأنك غلطت غلطتين إنك تضامنت مع النصارى وإن اللي دهسك خير أجناد الأرض !! ..

- لو مُت بقى في أحداث التحرير بتاعة الشرطة العسكرية فانت كدا هنبدأ نقول نحتسبك شهيد لأنهم طبعاً كلهم اشتراكيين متعفنين وبعدين كنتوا بتعطلوا عطلة الإنتاج !!!! .

- لو مُت بقى في محمد محمود ولا مجلس الوزراء فانت اللي جبته لنفسك هتطلع فوق بقى وربنا يتصرف معاك معندناش مقاسك بصراحة ..

- لو مُت بقى مع شوية العيال الصيع بتوع الألتراس في مذبحة بورسعيد فأنت اتقتلت والمقاس بتاعك لسة المصنع منزلوش يعني بالله عليك هتبعث يوم القيامة ماسك علم الأهلي دة كلام بردو ......

ألا صحيح هو المهرجان دة بجد ؟؟
يعني هما شهداء فعلاً ولا بلطجية طب يعني اللي مات عند وزراة الداخلية زي اللي فـ التحرير زي مذبحة بورسعيد يعني هيتوزعوا إزاي في الجنة ؟؟
 ولا بتوع بورسعيد هيخشوا النار ؟؟
 طب لو شهداء نقول عليهم شهداء ولا نحتسبهم شهداء ؟!..

صدقني مش هتفرق تفتكر لو انت قلت عليهم شهداء هيبقوا شهداء ولو قلت نحتسبهم شهداء ربنا هيحاسبهم على حسب اعتقادك مثلاً ؟! هو حد عين سعادتك ربنا واحنا مش حاسين ؟..

أعتقد في الحقيقة أن من يجادل في هذا الأمر لابد أن يراجع طبيبه النفسي ليكشف عن ماهيته الأصلية أهو من بني البشر أم من بني حيوان لا يمتلك العقل ..

الأمر يتضح لنا وضوح الشمس هناك دماء ولها حق وانتهى الأمر نتمنى بالطبع أن يقبلهم الله في منزلة الشهداء و سواء أضفنا إليهم لقب شهيد أم لا فمن له الحق الوحيد في التأكيد على ذلك هو رب العباد – عزوجل –

لكي لا ننخرط في تفاهات لا تبين سوى حقارة الذي يفكر فيها دعونا نقسم حق المقتول إلى جزئين ..

الأول :  قانون الدنيا وهو ما شرعه الله لنا في الحياة الدنيا لنطبقه نحن و لنسير عليه وهو أن من قتل يُقتل أو أي حكم شرعي أخر على حسب الجريمة تلك هي مسئوليتنا ولا دخل لنا في أكثر من ذلك .....

الثاني : قانون الأخرة وهو ما شرعه الله أيضاً ليقوم هو بتطبيقه يقبل من يشاء شهيداً ولا يقبل من يشاء له الحكم في كل شيئ . وأعتقد أنه لو كان لنا دخلاً بالطريق الثاني لكان من  الله أن وصف لنا حالات الشهادة بالتفصيل حتى نكرمهم بطريقة خاصة في الدنيا ولكن الله لم يفعل هذا واختص هذا الأمر لنفسه فلماذا نصر على إقحام أنفسنا في مسائل لا تشيع سوى الفرقة  .....

أنا أقول شهيد وأنت تحتسبه شهيد وهذا يؤكد وهذا يشكك ...
سيخسر كلاً منا الأخر ونُذل أهل المقتول - الشهيد - ....
في النهاية وانطلاقا من فطرتي وإنسانيتي التي خلقني الله بها أود أن أتوقف عن الكتابة دقيقة حداداً على أرواح من قتلوا في سبيل الثورة المصرية وأرجو منكم قراءة الفاتحة لهم لعلها تشفع لهم عند المولي عزوجل وربنا يستر وبعض القراء يقروا الفاتحة ميقولوش مضل مضلل ..
اللهم احفظ دماء المسلمين وأعراضهم إلى يوم الدين وارزقنا النصر من عندك

محمد مندور

9-2-2012