قصيدة " رسالة إلى سجين سياسي "

البحر شاهد عالبكا
عـ الحزن ويا الأسئلة
من غير جواب ..
اليأس أكبر مشكلة
لما قصادك يتقفل
ميت ألف باب ..
باب الكرامة والوطن
باب العمل ساب الأمل
والحلم تاب ..
العدل لو فكر يكون
يلقى ميزان المحكمة
ميل وخاب !
الظلم بيّن فـ العيون
والجهل عشش وسطهم
خان الوطن عهد السجون
أصبح وطنا معتقل
الظلم جمع شملنا
والحق غاب ..
وفي جلسة فـ عز البرد
كما اعتدنا تملي هناك
كتبت إليك يا صاحبي
جواب بيقول
 غير أن الليل هيبدأ
والقمر طول غيابه
والنجوم بتداري نورها
وسط غيمة من اللي غابوا
لسة جمبي كرسي ليك
كل حبة رمل شاهدة
عـ الأماني وعـ الكلام
عـ المناقشة وعـ التجلي
كنا حاسدينك تملي
كل حبة رمل شاهدة
بتشتكيك
الغياب طال النوبادي
والطريق مشتاق إليك
أنا أسف على الغيبة
وعـ التقصير
وأسف بردو عـ التغيير
وعـ الأحلام
شعبنا كلها ونام
والصفوف شايفة الطريق
بس فالحة فـ الكلام
هتفرج إمته مش عارف ؟!
يجوز النصر مش لينا
يجوز النصر بعدينا
لكن مكتوب
ولو طال الطريق لله
وزاد الظلم ما نلقاه
يكفيّنا كما تعلم
ويكفينا بما نعمل
ما ربك بردو
رب قلوب
واحشني يا صاحبي
مستنيك
وعالم بردو بالأحوال
يجوز انت اللي تستنى
فـ اخر كلمة كانت منك
كتبت معادنا فـ الجنة
على وعدك
وانا هفضل على وعدي
ومستنيك ..

محمد مندور