قصيدة " زيارة مفاجئة " - قصيدة مسرحية

الثوار :  شايف زحمة كتير مش عارف  
            خلق بتجري بوش سعادة
            قلت اما اجري أزاحم خايف
            تطلع حاجة تزيدني بلادة
            ماهو يا مظاهرة يا نجم السهرة
            في الحالتين راح اخدلي بيادة
            فقلت اما اسأل إيه يا اخوانا
            قالوا ......

الشعب : دة يوم معجزة مش زي العادة
            أة والنعمة شهيد أهو زارنا
            جي يتم نجاح بشهادة
            يشهد فيها إن احنا نجحنا
            والظالمين إعدام يا حمادة 

الثوار :  والظالمين إعدام يا حمادة
            لية الثورة مكنتش في بيتنا
            وشربنا في روحها القهوة وسادة
            ولبسنا خازوق وسكتنا فرحنا
            عادة وصبحت زي عبادة
            قالوا ..... 

الشعب : دة واد خاين وجاسوس
            يا بردعاوي يا جيش إبريل
            مأجور وكمان مدفوعله فلوس
            جي يزود كاسنا بويل .......  

الثوار :  فجأة اتكتم الصوت جوانا
             لما انفتحت طاقة نور
             كلو بيدعي يارب معانا
             وانا رايح اجري أعدي السور
             شفت المركب جاية بترسي
             والقبطان فرحان مسرور
             والركاب أشكال اعرفهم
             شفت صورهم في الجرنال
             صفحة شهدا مصر بلدهم
             فجأة اتقلب الحال دة بحال
             طبلة وزمر وهيصة رخيصة
             زفة بدم شهيد متحني ....
             والأيام جايلنا كبيسة ...
             وانا واقف في الدور مستني
             نفسي بجد أبوس رجليه
             أما الباقي فحاجة تحزن
             في اللي بيسأل هي الجنة شكلها إية ؟!
             واللي بيجري وراه ويشده
             عاوز يمسك نور بإيديه
             واللي يبوسه واللي يزقه
             واللي يكعبله من رجليه
             أخر واحد في الركاب
             أول واحد فيهم مات
             شاب في أخرعقده التاني
             عدى الكل بسرعة وفات
             كإنه بيخفي من قدامي
             خالد عمره ما مات جوانا
             بس اليوم دة مكنش سعيد
             زرع الحلم بدمه معانا 

             واحنا رجعنا لـ تاني عبيد
             خايف اسأل أصلي مقصر
             حقه لحد دلوقتي مجاش
             دم الشهدا بيزيد أكتر
             ومصر في غرفة الإنعاش
             ويوم ما يجيبوا الشهدا زيارة
             تبقي كأنها حفلة بلاش
             مالك ساكت ليه يا شهيد
             عارف إنك مش مسامحنا
             إحنا غلطنا في حقك ياما
             بس ورب العزة حاولنا
             قول واتكلم واشتم فينا
             إحنا يا دوب أنصاف رجالة

الشهيد :  لا يا مناضل إنتوا أملنا
            إوعاك تيأس من دي الحالة
             ثور واتكلم واغضب تاني
             لجل نبطل عيشة العالة
             عارف واحنا في جنة ربك
             كنا نبص عليكم نبكي
             دمنا راح وسط الزحمة
             واللي جايلنا بهمه بيشكي
             رفضوا يحطوا في إسمه شهيد
             أصل وفاته في ماتش الكورة
             مش في مناسبة تليق بمقامه
             جهل وعدل وبعنين عورة
             فاكر وسط ما كنت بموت
             كنت كتبت بإيدي وصية
             حقي أمانة في إيد اخواتي 

                       راحوا اخواتي وراحت هية ؟!
              هاتها أزود كلمة عليها ..
              كل العسكر دول حرامية
              يلا يا شعب الثورة اتوحد     
              لجل ما ترجع مصر بهية
              يسقط يسقط حكم العسكر
              يسقط كل عداها وهي
              هترجع تاني تقود الأمة
              وترجع كل بلادنا قوية 

النظام :    إنت بتهتف ضد العسكر
              اللي حموك من بطش الظالم
              مالك إنت ومال السلطة
              مُت شهيد وأهو ربك عالم
              ليك الجنة ولينا الدينا ...
              إحنا نقرر مين الحاكم
              أهلك دول بالدية يعدوا
              مش بقواضي ولك محاكم
              لوهيعاندوا طب ما يعاندوا
              يخبطوا راسهم فـ أجدع حيط
              وإنت اتعود تحمد ربك
              فكر وبلاش تبقي عبيط 

الشهيد:    يسقط يسقط حكم العسكر

النظام :    سيب الشعب المصري في حاله
              هو هيعرف مين يختار ...
              بكرة هيطلب حكم العسكر
              هو لوحده مهوش إجبار
              ركز إنت في جنة ربك
              سلم علي القاعدين وياك 

              يلا معادك قرب يخلص
              تلحق تحجز جمب ملاك

الشهيد :   يسقط يسقط حكم العسكر

النظام :    يا ابني العسكر دول أسيادك
              دول مُلاك السلطة في بلدك
              طب كنت إسأل قبل الحلم
              إسأل واعرف ممن سبقك 

الشهيد :   يسقط يسقط حكم العسكر

النظام :    شكلك غاوي مناهدة ودم
              عندك حل من الأتنين
              يا هترجع من غير مطرود
              يا هتهتف وهصفي العين
              وهعبي في جسمك خرطوش
              واهو تتصابلك قول سنتين
              وهعري معارفك قدامك
              تبقي تشوف هتستر مين
              واهو بالمرة هندهس راسك
              وفي صدرك نضرب عيارين
              وهنرجع ونكون أسيادك
              فكر قولي تروح على فين ؟!

الشهيد :   يسقط يسقط حكم العسكر
              يسقط يسقط حكم العسكر

الثوار :    وكأنه حلم وهم وخيال
              الشهيد مات مرتين
              وفي كل مرة عمره ما فكر
              ولا حتي أخر ثانيتين  

              والنهاردة وفي النهاية
              لقيته حملني الوصية
              كلمة للجايين أمانة
              رجَّعوا الضحكة لبهية
              ويا رئيس مصر اللي جي
              في رسالة مني ليك
             لو فضلت ليومها حي
             راح أقولها ودين عليك
             راح أقولها بعلو صوتي
             حق اللي راحوا بين إيديك   

            

محمد مندور

فرسان القلم