أوجاع - رباعيات

- 1 -
أنــا مبسوط ومـن جـوا منيش فرحـان
بداري همومي مش عايز بضعفي تبان
وقلبي وحيد وعقلي في الفضا شارد
لـكـن طمعـان فـ رحمة ربنـا المنـان
...............
لـ محمد مندور ..... فرسان القلم
========================

- 2 -

شِعري مهوش للبيع عامي بوزن عليل
يشفي قلوب الغير من جرح شاف الويل
بيعود عليه الخير لما الجروح بتروح
لكن فـ قلبي عويل من كل قصة ليل  
..............
لـ محمد مندور .... فرسان القلم
========================
- 3 -
بحار وماسك بين إيديه مركب ورق
خايف عليها من الكلام و من الغرق
الحلم صاحي عالشراع بدموع عينيه 
والموج هياجه زاد فـ داخلنا القلق 
...................
لـ محمد مندور ... فرسان القلم
=========================

- 4 -
بصيت كتير عـ البحر مستني يسمعني
فاشكيله من يأسي وجــــراح بتوجعني
لكنه موجه هــاج ورمـــاني بالمكتوب 
مكتوب أكون كالبحر أسراري تدبحني
..................
لـ محمد مندور .... فرسان القلم
=========================
- 5 -
محرومة أحلامي من لحظة التحقيق
والفقر بكاني عمره ما بل الريق ... 
ومفيش فـ إمكاني غير بس إني اصبر
وادعي لرب الكون إنه يفك الضيق 
...............
لـ محمد مندور .... فرسان القلم
========================
- 6 -
أنا مبسوط لكن شايل
 هموم الدنيا فوق كتفي 
حزين قلقان ومتعشم
 تيجي الدنيا كدا فـ صفي 
وراضي بالقضا والحال
وبحمد ربي عـ النعمة ..
وبطلب بس وفـ سري
تحني يا دنيا وتخفي ... 
...................
لـ محمد مندور ..... فرسان القلم
========================
- 7 -
أنــــا والهــــم تقريباً
ومن صغري بقينا صحاب
مليش غيره بيندهنى
ويسكن قلبى بالترحـــاب
وأما الفرح مش راضي
وحتى القلب مش فاضي
يساع غيره من الصحبة
ويفتحله الطريق والبـاب
………………..
لـ محمد مندور ... فرسان القلم
========================
- 8 -
الفقر قال للجوع مـ تيجي نتفارق
بكفايا بحر دموع فيه البشر غارق
سمعه إبن آدم قاله إنت إيش حشرك
راضي بقضاء الله فمعدش شيئ فارق 
.........
لـ محمد مندور .......... فرسان القلم
========================
- 9 -

كداب يقول مستور والستر مش فاضي
عريان في عز النور لكنه كان راضي
الجوع مبيفرقوش والناس دية لابسة وشوش
ربطوه مكان الطور حاكموه كما القاضي 
..............
لـ محمد مندور ..... فرسان القلم
=========================

- 10 -

طال الطريق من غير صديق يبعد جفاه
بتعيش غريق والقشة راحت من وراه 
ويعود تعودلك بسمتك تضحك معاك ... 
وساعات طريق بيكون صديق ترتاح معاه 
..................
لـ محمد مندور .... فرسان القلم
======================

- 11 -
عاجز فـ كل السكك ما هو أصله مش دورك
مات اللي عاش يسندك ويقوي فـ ضهورك 
و الدنيا ما بتستحي بالعكس تيجي عليك
و بظلمهـا بتجبرك إنـــك تــكــــون غيرك ...
....................
لـ محمد مندور ..... فرسان القلم
=======================
- 12-
شحات وقال لله أحسنله ميقولهاش
مستور وشافه راح إداله مستناش
واللي شحت كداب يصبح غني بالمال
واللي عشاه العفة رزقه في جنة اتحاش
....................
لـ محمد مندور ....... فرسان القلم
=========================
 - 13 -
ويبقي الليل يهواني وأهـواه بـــلا خجل 
أبث إليه أحـزاني فيسمعني بــــلا عجل
ويأمرني بأن أنسي فشمس الصبح طالعة 
عشقت الليل مـرآة أصـارحها بـــلا وجـل
...............
لـ محمد مندور ... فرسان القلم
========================
- 14-

مـــــــرار الفقر بـيغنـي 
وبينادي علي الصابرين
وجوعه تملي مستني 
يفارقه مرة ولا اتنين 
فيضحك ضحكة مصطنعة
يـصبر بيهـا أهــــل الصبـر 
ويرجع يبكي عالمكتوب 
ويرضي ويبقي مـ الشاكرين 
..................
لـ محمد مندور .... فرسان القلم
========================

- 15-
يا اسكندرية يا أم العيون السهرانين
عالشط مية تروي قلوب العطشانين
وفـ الشوارع نور وطالع من البيوت
رايح بيهدي فـ العقول السكرانين
................
لـ محمد مندور ... فرسان القلم
=======================

- 16-
سألوني عن أصلي قلت الفصيل إنسان
الحق عندي دين والعدل دة العنوان ... 
قالوا احنا شفنا كتير من ظلم كان طاغي
طلع الميزان مقلوب أصل البشر ألوان
....................
لـ محمد مندور .... فرسان القلم
=======================
 - 17-
ملعون أبوها صبية مفتونة بالخواجات
يترجرجوا نهديها من حدة النظرات
وأنا شاب يمكن بس شاخ بدري الجسد
من كتر ذكر النهد في الحكايات ........
..............
لـ محمد مندور ..... فرسان القلم
======================
- 18- 
البيوت مقفولة لكن جوا منها ألف سر 
في بيضحك في حزين في حيطانه بتبكي مر
في سكنها من جهنم في سكنها من نعيم
في بيوت عارفة الطريق في بيوت مش لاقية بر
...............
لـ محمد مندور ..... فرسان القلم
========================

- 19 -
قهوة زحمة الخلق فيها متنحين
شيشة نازلة وفحمة والعة من سنين 
شاي محلي بجوع مخلى الطعم علقم 
من مرار الصبر دايماً عـ الروتين
....................
لـ محمد مندور ..... فرسان القلم
=======================
- 20 -
حبال الدنيا لو دايبة
هنتعلق ولو أحلام
وقطر العمر لو عدى
هنلحق ولا دية أوهام ؟!
ترد حبالك الدايبة
طب احلم قبله بالدنيا
وبعد الدنيا لا مانع
تسيب الحلم للأيام
....................
لـ محمد مندور ..... فرسان القلم

=======================

محمد مندور 

فرسان القلم 

قصيدة " يا شعب مصر "

يا شعب مصر
قالها تميم ابن الأصول
لما كان فـ الشعب ناس
لما كان فـ القلب دم
لما كان العقل زينة
لما كانت روحنا فينا
لما كان عندك كرامة
مش فـ رجل البيه مداس
يا شعب مصر
كيف الشهيد ؟!
اسمه انكتب ؟!
فـ الشارع المرشوش دماه
ولا انجلد
 لما لقاكم قلتوا أة ..
مش أة فـ رد الظلم لأ
بل آه لمتعه فعلته
والفعل مش بس الإيدين
ولا شرط منصب فيه تُطاع
الظلم لو عنك بعيد
إعمل بقدر المستطاع
لكن تشوف اللي ظلم
هو البطل
وان الضعيف هو اللي باع
ملعون ضميرك يا جدع
ماشي ورا الذل اتباع
يا شعب مصر
مين اللي قال ان الوطن
صوت النشيد
وان الملك يفضل ملك
واحنا العبيد
مين اللي قال ان احنا
ناكل مـ الفتات
والباشا يملى الكرش
من قوت اللي مات
ونعيش بنطلب حقنا
ونقوله هات
واما فـ يوم الذل
يركب ضهرنا
نهتف يعيش الباشا
 حاكمنا الشديد
يا شعب كيفك تتركب
وقصاد مفيش
تاكل وتشرب تتعلف
لجلن تعيش
ويصيبك الملعون بداء
 المركوبين
تركب يا دوب قرصين فياجرا
وجمبهم حتة حشيش
يا شعب فوق
وارفع لفوق إيدك
وراسك للسما
واطلب تشوف الحق
وتزيح العمى
الثورة مش لمة وعلم
الثورة مش غنوة بقلم
الثورة موت
الثورة تلغي بأمرها
 فرض السكوت
الثورة دين
مش دين مشايخ
ميخافوش غير الأمير
بيناموا يصحوا
يشتهوا طعم الأنين
وازاي هنعبد ربنا
والباشا راكب ضهرنا
والدقن فالحة تقولنا
الصبر للمتصبرين
الثورة دين
مش دين سياسي
كل دينه معرصين
الثورة دين
مش دين عساكر
ضدهم بنقوم ونهتف
يسقط المعجونه إيده
بدم الشقيانين
الثورة دين
الثورة دية للمركوبين
يا شعب ثور
ارفض ركوب الباشا
عـ الاكتاف
عيشها بكرامة
حتى لو هتعيشها حاف
بكفايا ذل المشي
 جوا الحيط
بكفايا دة اللي بيتركب
هو اللي خاف
يا شعب إوعى
إنت مش عبد الجنية
إنت مش عبد الأوامر
إنت مش عبد السكات
إنت عبد لرب واحد
رزق كل الكون عليه
كسر الأصنام وتوب
ملعون أبوها المحسوبية
والبيادة والنسور
ملعون يا ذل فـ وقفتي
أخر الطابور
ملعون يا باشا ويا ملك
ملعون وشعبك زمبلك
ملعون سياستك والنظام
ملعون نجاستك باحترام
ملعون بجيشك وبعساكرك
وبمواطن أصله فاكرك
حضرة الباشا الهمام
يا شعب مصر
يا شعب مصر
أنهو شعب ومين فـ دول ؟!
ما احنا شعب وهما شعب !
واحنا مين وانتوا مين ؟!
كلنا مية وطين
بس تفرق فـ الضمير
كلها على كل لون
فيها بعض من الحمير
واللي باقي هو يمكن
اللي ينفع يبقى شعب !!

محمد مندور

فرسان القلم