قصيدة " ألف ستار "

ليل السهر ستار
يخفي دموع الهم
والدنيا ألف ستار
مسرح ماليه الغم
والعرض دايماً خاص
الضحك فيه مسجون
والفرح فيه مركون
والبسمة فيه تتذم
دنيا ومبتسعناش
ومفيش حاجات ببلاش
تحلم تشوف أحلام
تدفع ومتشوفهاش
دفتر جراح الخلق
الحلم فيه يتلم
مركون فـ وسط كتير
مسجون بأمر وزير
عالرف ناس سبقوك
والسر فـ التأخير
اصبر متصبرشي
تجري ومتنولشي
الحكم له مواعيد
بين جلسة والتانية
بين نقض واستئناف
تهرب سنين عمرك
وانت على الاكتاف
تسمع فـ صوت ينده
حكم اللي شايلينه
إنه كان ابن غفير
والحكم فـ الدنيا
عمره ما كان أخر
ويل لقاضي الأرض
من ظلمه فـ الأخر
كمل كما شوفتك
واثبت كما سبتك
واياك فـ يوم تقبل
وتقول هكمل ليه ؟!
لـ يموت ساعتها الحلم
حلمي اللي عاش جواك
ربك هيحكم فيه !

محمد مندور و محمد حكم

فرسان القلم