قصيدة " خلف الخلاف "

صباحكم بيضحك صباحكم حزين
صباحكم محلي بطعم الأنين
صباحكم مكركب ملخبط تملي
بينده ونفسه ترد السنين
صباحكم بيضحك فـ وش الأمير
ويزرع همومه فـ قلب الفقير
ويستنى لما يحين المعاد
يكش العساكر بأمر الوزير
صباحكم بدقة وشوية صميت
تشبع بطون العيال الصغار
وغيرهم وليمة فـ قلب السويت
ولا تكفهوشي لنص النهار
صباحكم بدم اللي ماتوا لخيرها
وخير البلد دي تملي لغيرها
ومهما تزيد النهايب يموتوا
ولا حتى ممكن يجيبوا أخرها
صباحكم مخالف لخلف الخلاف
مناسب معاكس تملي اختلاف
بيلقي فـ وشه اللي رافض يموت
ويهرب تملي اللي سلم وخاف
صباحكم بينده فهل من مجيب
هل من ملبي لدعوى الحبيب
هل من مواطن يعافر ويقدر
يلون بقايا النهار الكئيب
صباحكم يا أهل البلد دي أكيد
ومهما اللي ظالم عناده يزيد
يغور اللي ظالم وتفضل بهية
ونرجع سيادهم وهما العبيد
صباحك يا بلدي معبأ حنين
وحبك تملي فـ طهر الجنين
ومهما تزيد المصايب هنقدر
نعيد اللي فاتنا فـ بعد السنين 

محمد مندور

فرسان القلم