قصيدة " الألف مدنة "

يا مصر يا ام الألف مدنة
مبقتش سامع صوت أدانك

كل الجوامع فيكي ساكنة

ولا حد عارف فين لجامك

ومابين شيوخك ألف لكنة

ولا بردو نورلك ظلامك

يا مصر فوقي دة الفساد

عايش معشش بين ولادك

يامصر فوقي أنا وجعي زاد

والهم طال قلبي وطالك
...............

يا مصر يا ام الألف مدنة

مبقتش سامع غير سكوتك

كل الخطايا فيكي ساكنة

والظلم زودلك قيودك

والعدل غاب عنك وفاتنا

بكفايا ذل نهايته موتك

يا مصر دة احنا عملنا ثورة

علي جلادين نهبوا في قوتك

والجلادين لعبوا المؤامرة

علي شعب كان عشمان في جودك

.............

يا مصر يا ام الألف مدنة

ردي وجاوبي عالسؤال

ولادك الخاينين بلدنا

جم في الحرام ولا الحلال

ما أكيد حرام نجس شرفنا
  اللي بيجري دة محال
 مات الكبير قمنا فرحنا

لقيناه مخلف كوم عيال

من نار وجمر يا دوب نفخنا

بان الفساد فوق الخيال

.............

يا مصر يا ام الألف مدنة

أنا لسة سامع صوت جنودك

في الحرب لما بإيد ولادنا
وبعزمهم حرسوا حدودك

كان حلم ولا دة وهم ساقنا

أصبحنا نلعن دين جدودك

يا مصر خير الجند إحنا

مش مجلس الخاينين عهودك

يا مصر سم النيل دبحنا

ومعدش نافع ليه سدودك

...........

يا مصر يا ام الألف مدنة

لية اللي زيي مش في بالك

دايرة لكيف أنجاس بلدنا

مع إن حالي هو حالك

السر جوا قبور سلفنا

لعنة وكانت مكتوبالك

فرعون وفرعناه ركبنا

متقوليش مالي ومالك

مالي إنتي ومالك إنتي

 لعنة و صبحت داء عيالك 

..............

يا مصر يا ام الألف مدنة

صوتي بيزعق ولا حد سامع

مسموع كلامهم هما واحنا
الظلم كان بين وجامع
أنا مستعد يا مصر اضحي

وابوس ترابك كل يوم

واموت شهيد لجلن تصحي

شعب مصر من الغيوم

بس احس إن انتي أمي

منتيش بلد يحكمها شوم

محمد مندور