قصيدة " رسالة شهيد "

أنا اللـي وقفـت
 في الشـارع في عز الضرب

وانا اللـي رفضــت
 تتســلم لنجــل الكلــب
وانا اللـي هتفـــت
 يسقـط كل ظـالم شعب
وانا اللـي هزمـت
 جوايـا جـراح في القـلب
أنا اللـي إيديه
 شـالت ميت شهيد وشهيد
وقلــت ينايـــر القــادم
 دة يــوم العـــــيد
وعـدي الشـهر والتـاني
 ولسـة بـعـيـد 

نـزلت اهـتف
 ومـن تـاني أخويـا شهيد 

فمـات أحـمد
 ومـات مينـا مكـنش سـعيد

ومات الأزهري والشيخ
 ومات الطالب الثاير

ومات كل اللي نام جمبي
 فـ عز البرد في يناير

وماتت أم مـ الحسرة
علي الحق اللي راح ولا جاش

وعاش الأب بالكسرة
 وإبنه في غرفة الإنعاش

وبان مين اللي كان ضدي
 وبان مين اللي كان خاين

وبان مين اللي باع جدي
 وخوني عشان هاين

عليه دمي ودموع أمي
 وإبني اللي أبوه مقتول

وسابوا الفاعل الجاني
 وحبسوني أنا مفعول 

وإعراب الشباب فيها
 يا مرفوع يا أكيد مشلول

وحتي الباقي في صفوفهم
 معندوش مـ الأماني كتير

مابين مسجون وبين تايه
وبين مسحولة في التحرير

وبيني بينك الباقي
 مهـوش بإيديهـم التـغيير

عشان طالع علي كتافهم
 قيادة مجلس الطراطير

ومع إن الطريق مسدود
 ومكتوب بالعريض فاشل
ومع إن الجراح زادت
 وملناش للفرح ناشل

أنا إيماني من سني
 شباب حلمه مبيسعهوش

معندوش من المانع
 يقدم للنجاح دة جيوش

ولو ماتوا نجيب غيرهم
 من الصاحيين

وأرواحهم تعود تهتف
 في جنة خلدنا عايشين

فيا شعب اتذكر إسمه
 في سنة خير خلق الله

ومحمودة كمان بلده
 ومذكورة في كتاب الله

كفايا اللحس في بيادة
 علامها عـ الضهور موجود

ياريت تحفظ جميل الدم
 يا هاخده يوم حساب مشهود

ولو مش غاوي تتحرر
 أو الحرية مش لزماك

أو العيشة في عهد الذل
 والقهرة كدا وحشاك

بلاش تنزل تدوس أرضي

 عليها مات صديقي هناك

وياللي جي في السكة

 ومكتوبلك تجيب النصر

متنساش اللي سال دمه

 عشان توصل لذاك القصر

أنا عارف بإن السكة هطول

 ومش خايف ولا قلقان

عشان شايف كتير زيي

 فـ باله الحلم مش نسيان 

وكلمة للي باقيلي

 ضميره صاحي فيه الخير

أنا عايزك تزور أمي

 تصبرها دة لسة كتير

وتدعيلي وتقرا الفاتحة

 لو انت معدي عـ التحرير

بقلم : محمد مندور 

28-5-2012